Dia 30 di sèptèmber 2022 Ombudsman di Kòrsou, Keursly Concincion, a organisá un kombersashon di mesa rondó tokante e tópiko di pobresa na Kòrsou. Na e kombersashon aki a partisipá un grupo grandi di organisashon lokal ku den práktika ta traha pa kombatí problemanan sosial na Kòrsou. 

Durante di e kombersashon aki e partisipantenan a interkambiá di opinion tokante kon por mehorá e koperashon ‘den field’ entre e organisashonnan, di manera ku e yudansa ku e siudadano vulnerabel ta risibí por ta mas efektivo. A papia tambe ámpliamente tokante posibel solushonnan pa kombatí i prevení pobresa, manera un miho sistema di edukashon i enseñansa pa hobennan i un ‘coaching’ intensivo pa siña adultonan kon pa ta mas responsabel ku e medionan finansiero ku nan tin. 

Un di e konklushonnan prinsipal ku a sali for di e kombersashon di dia 30 di september último, tabata ku tin ya kaba diferente rapòrt skibí tokante e tópiko di kombatimentu di pobresa na Kòrsou, i ku e momento a yega pa tuma akshonnan konkreto. Ombudsman a traha un relato di e kombersashon di mesa rondo, i lo manda esaki pa Minister di Desaroyo Sosial, Labor i Bienestar, ku e meta pa interkambiá ku e Minister riba kon por implementá algun di e rekomendashonnan ku a sali for di e kombersashon. 

Impreshon fotográfiko