Dia 11 di yüli 2023 Ombudsman di Kòrsou, Keursly Concincion, a hasi entrega di su relato di aña 2022 na Presidente di Parlamento di Kòrsou, señora Charetti America-Francisca. Ku entrega di e relato aki, Ombudsman a informá Parlamento den liñanan general tokante e trabounan ku e instituto a hasi den aña 2022.

Den aña 2022 Ombudsman a risibí un total di 811 kaso. Mayoría di e kasonan aki a keda solushoná den aña 2022, i tabata tin di haber prinsipalmente ku e echo ku siudadanonan òf organisashonnan no a risibí kontesta di gobièrnu riba nan kartanan òf petishonnan.

E tres ministerionan ku Ombudsman a risibí mas tantu kaso tokante di nan tabata:

  • Ministerio di Tráfiko, Transporte i Planifikashon Urbano [92]
  • Ministerio di Hustisia [92]
  • Ministerio di Salubridat, Medio Ambiente i Naturalesa [57]

Den e relato di aña 2022 Ombudsman a para ketu na diferente desaroyo ku tabata importante pa e instituto, manera e konferensianan ku e instituto a organisá tokante e situashon di pobresa na Kòrsou. Ombudsman a skibi tambe  diferente karta durante di aña 2022 den kua e ta ekspresá su preokupashon pa ku e situashon di bibienda na Kòrsou. 

A dediká atenshon tambe na e echo ku rapòrtnan di e instituto ainda no ta keda tumá sufisientemente na serio dor di gobièrnu, i kiko ta e konsekuensia ku e komportashon aki tin pa e siudadano.

Finalmente Ombudsman a splika Presidente di Parlamento ku e trabounan pa promové derechi di mucha na Kòrsou den praktika ta keda hasí, pero ku ainda no por kuminsá ku búskeda i selekshon di kandidatonan pa yena e funshon di Ombudsman pa Mucha, ya komo ku ainda e lei ku ta regla e kondishonnan laboral sekundario mará na e funshon aki no ta kla.

Download : Relato anual Ombudsman 2022