Entrega di Relato Anual 2025 di Ombudsman na Presidente di Parlamentu di Kòrsou

For di e relato por konkluí ku e kantidat di petishonnan ku a keda entregá den 2025 a subi konsiderablemente. Ombudsman a trata 1.340 kaso den aña 2025, kompará ku 958 den aña 2024. Mayoria di e kasonan aki tabata trata siudadanonan den situashonnan vulnerabel, manera personanan di edat avansá, personanan sin sufisiente medionan finansiero i tambe muchanan i nan representantenan, kendenan no tabata hañando kontesta for di gobièrnu. Un gran parti di e siudadanonan aki a haña un kontesta, despues di un intervenshon di Ombudsman serka gobièrnu i su organisashonnan.

Den aña 2025 e tres ministerionan ku Ombudsman a risibí mas tantu petishon tokante di nan tabata:

· Ministerio di Tráfiko, Transporte i Planifikashon Urbano (107);

· Ministerio di Hustisia (106);

· Ministerio di Desaroyo Sosial, Labor i Bienestar (72).

Ombudsman a enfatisá den su relato ku mester sigui fortifiká e leinan i e institutonan di pais Kòrsou di manera ku por garantisá mas tantu posibel ku tur siudadano, grandi i chikí, ta haña e yudansa ku e tin derechi riba dje di un forma mas efektivo. Establesimentu por ehèmpel di un lokèt hurídiko di gobièrnu ku ta fasilmente aksesibel i gratis, pero tambe miho kolaborashon entre e organisashonnan di gobièrnu ku ta atendé ku derechinan di mucha, por yuda den esaki. E konklushon final den e relato 2025 ta ku gobièrnu mester pone e perspektiva di e siudadano sentral di forma struktural pa por duna un miho servisio.

Pa lesa e relato anual 2025 di Ombudsman klik aki.