Investigashon na nivel di henter e isla i pasonan siguiente pa atendé ku maltrato di mucha

E ehekushon di e investigashon aki a keda enkomendá na University of Curaçao. Den e kuadro aki, a papia intensivamente ku diferente ‘stakeholder’, prinsipalmente lokal, for di e kampo di derechinan di mucha. E investigashon preliminar aki a keda finalisá na fin di febrüari 2026, despues di kua a presentá e rapòrt di konseho ofisialmente na Ombudsman dia 19 di mei 2026.

E rapòrt ta identifiká puntonan krítiko krusial ku ta eksigí un aserkamentu dirigí. Asina a bini dilanti ku sup-reportahe di maltrato di mucha ta hunga un ròl grandi i ku no ta rekonosé formanan spesífiko di maltrato semper mesora. Mas aleu a konstatá ku kaminda korekshon físiko tin biaha ainda ta keda normalisá den e kultura, maltrato emoshonal netamente sa keda kompletamente invisibel. Banda di esei, muchanan no ta papia semper libremente, en parte pasobra serkania sosial den un komunidat chikí ta influensiá e frankesa di e víktimanan fuertemente.

Ku e investigashon preliminar aki, Ombudsman a haña un bista kla riba e direkshon mas apropiá pa atendé ku e problemátika konstatá na un manera efektivo. E investigashon aki ta mustra ku pa por komprendé kon, pakiko i na unda maltrato di mucha ta tuma lugá riba e isla, ta nesesario pa ehekutá investigashonnan mas profundo i midi datonan for di sero (nulmeting). Ombudsman ta spera ku e investigashonnan aki, ku lo keda ehekutá den fase, lo kontribuí sustansialmente na kibra tabú i na oumentá e konsientisashon i konosementu di derechinan di mucha den henter e komunidat di Kòrsou. E derechinan fundamental di e mucha riba e isla lo keda strukturalmente mihó protehá i garantisá ku esaki.